کوردستان

راگەیەنراوی حكومەتی هەرێم لەسەر گۆڕانكاری پاشەكەوتی مووچە


           
.
حکومەتی ھەرێم لەسەر  دەستکاریکردنی پاشەکەوتی مووچەو پێدانی مووچە مانگانە لەکاتی خۆیدا راگەیەنراوێکی بڵاوکردەوە.

حکومەتی ھەرێمی کوردستان لە راگەیەنراوێکیدا کە وێنەیەکی گەیشتۆتە PUKmedia، ئاماژەی بەوەداوە پێشنیوەڕۆی ئەمڕۆ ٢٨ی ئاداری ٢٠١٨، بەسەرۆکایەتی نێچیرڤان بارزانی و قوباد تاڵەبانی سەرۆک و جێگری سەرۆک وەزیران ئەنجومەنی وەزیرانی ھەرێمی کوردستان کۆبووەتەوە.

لە سەرەتای کۆبوونەوەکەشدا مەحمود حاجی ساڵح وەزیری کاروباری شەھیدان و ئەنفالکراوان، کورتەیەکی دەربارەی بڕیارێکی دوێنێی پەرلەمانی عیراق خستۆتەڕوو کە لە بەرژەوەندیی کەسوکاری شەھیدان و ئەنفالکراوان و زیندانییانی سیاسی ھەرێمی کوردستاندایەو ئاماژەی بەوەداوە ئەو توێژەی لەھەرێمی کوردستان لە بڕیارەکە سودمەند دەبێت، مینحە و ئیمتیازاتیان لەگەڵ عیراق یەکدەخرێت و دەکەوێتە ئەستۆی حکومەتی فیدراڵی عیراقەوە وەک لە دەستووردا ھاتوەو حکوومەتی ھەرێمی کوردستانیش لە ساڵی ٢٠١٥ـوە کاری لەسەر کردووە.

ئەنجومەنی وەزیران ستایشی ھەوڵەکانی وەزیری کاروباری شەھیدان و ئەنفالکراوان و د. ئامانج رەحیم سکرتێری ئەنجومەنی وەزیران و تیمەکانیانی کرد بۆ کارو ماندوبونیان لەسەر ئەم پرسە، ھەروەھا سوپاسی د.حەیدەر عەبادی، سەرۆک وەزیرانی عیراق، پەرلەمانتارانی عیراق بەگشتی و پەرلەمانتارانی کوردستان لە پەرلەمانی عیراق بەتایبەتی کرد کە رۆڵیان لە دەرچونی ئەو بڕیارەدا ھەبووە. 

ھەر بەپێی راگەیەنراوەکە، لەکۆبوونەوەکەدا رێباز حەملان وەزیری دارایی و ئابووری، سیستمی نوێی مووچەی رونکردۆتەوەو تیایدا وردەکاریی چۆنیەتیی خەرجکردنی مانگانەی مووچەی خستۆتەڕوو کە گۆڕانگارییەکی گەورە بە ئاڕاستەی کەمکردنەوەی رێژەکانی پاشەکەوت لەخۆ دەگرێت بەجۆرێک کەسوکاری سەربەرزی شەھیدان و ئەنفالکراوان و خانەنشینان و کەمئەندامان و خاوەن پێداویستییە تایبەتەکان و ئەوانەیش کە موچەیان لە (٤٠٠) ھەزار دینار کەمترە، مانگانە تەواوی مووچەکانیان بەبێ ھیچ پاشەکەوت و لێبڕینێک وەردەگرن.

دەشڵێت: بەپێی ئەو سیستمە نوێیە، ئەو مووچەخۆرانەی لە (٤٠٠) ھەزار دینار بەرەو ژوور تا سێ ملیۆن دینار وەردەگرن، بەپێی زۆرو کەمی مووچەکانیان، بەڕێژەی ٩٠% تا ٧٥%یان بۆ خەرج دەکرێت، ھەرچی پلە تایبەتەکانە، مووچەکانیان بەپێی سیستمی پاشەکەوتی جاران دەدرێت و تەنھا ٢٥%ی مووچەیان بۆ خەرج دەکرێت.

لەبەشێکی دیکەی راگەیەنراوەدا ھاتووە: ئەنجومەنی وەزیران دووپاتی کردەوە کە ھەر زیادبوونێکی داھات دەبێتە ھۆی کەمکردنەوەی رێژەی پاشەکەوتی مووچە، جەختی لە بەردەوامیی پرۆسەی شەفافیەت و چاکسازی و پابەندبوون بەپڕۆژەی وردبینیی داھات و خەرجییەکان کردەوە کە ئێستا لەلایەن ھەردوو کۆمپانیای نێودەوڵەتیی دیلۆیت و  ئیواییەوە جێبەجێ دەکرێت.

ئەنجومەنی وەزیران راشیگەیاندوە: ئامانجی ئەوەیە لە ھەنگاوەکانی داھاتوودا پاشەکەوتی مووچە بە یەکجارەکی نەمێنێت، بۆ ئەم مەبەستەش دەرکردنی یاسای چاکسازی لە مووچەو خانەنشینی کە ئێستا لە پەرلەمانی کوردستانە، بە ھەنگاوێکی گرنگ لە قەڵەمدا.


454بینین‌‌‌
3 هەفتە پێشتر - Mar 28 2018 7:55PM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ