کوردستان

فەرماندەیەکی یەکێتی : کاتی ئەوە ھاتووە ئیدی سنوورێک بۆ ئەو ناعەدالیەتییەی ھێزەکانی سوپای عیراق و حەشدی شەعبی دابنرێت





مستەفا چاوڕەش، ئەندامی سەرکردایەتی یەکێتی و فەرماندەی سەربازیی پێشمەرگە، بە ماڵپەڕی فەرمی پارتی دیموکراتی کوردستان رایگەیاندووە: "کاتی ئەوە ھاتووە ئیدی سنوورێک بۆ ئەو ناعەدالیەتییەی ھێزەکانی سوپای عیراق و حەشدی شەعبی دابنرێت، بۆیە ئێستا خەریکی رێکخستنەوەی ھێزەکانی پێشمەرگەی کوردستانین، سەنگەری نوێی خەندەق لەگەڵ ئەو ھێزانە لێدراوە و چیی دیکە رێیان نادەینێ، یەک بست پێشڕەوی بکەن، لەوەی ھاتوون لە دوای رووداوەکانی ١٦ی ئۆکتۆبەر".

لەبارەی ئەوەی ئەو ھێزانە داوای بازگەی شێخ باوەی، سنووری ئیدارەی گەرمیان دەکەن و لە قەرەھەنجیر چەند جارێک ئاژاوەیان ناوەتەوە، فەرماندە سەربازییەکەی یەکێتی وتی: "لەو شوێنانەی کە ھێزەکانی عیراقی لێیە، ئیدی لەوە ‌زیاتر بیانەوێت پێشڕەوی بکەن لێیان قبووڵ ناکەین، بۆیە ئەگەر رێیان بدەین ئەوان دەیانەوێت کوردستان ھەمووی کاول بکەن، بۆیە ئیدی بێت و بیانەوێت سنوور ببەزێنن، شەڕ دروست دەبێت".
 
ئەو فەرماندە سەربازییەی یەکێتی دەشڵێت: "لەگەڵ کاک (مەسعوود بارزانی) کۆبونەوەمان کردووە، باسمان لە سەنگەرەکانی پێشمەرگە و رێکخستنەوەی ھێزەکانمان کرد، تەواوی رەوشی سەربازیمان لە سەنگەرەکان تاوتوێ کرد، تەواوی میحوەرەکان رێک خراونەتەوە".

لەبارەی رەوشی ئێستا‌ی دووزخورماتوو ناوبراو دەڵێت: "حەشدی شەعبی ئەو شارەیان کاول کردووە، ئەوەش حکومەتی عیراق لێی بەرپرسیارە،‌ کە بە پێی قانوون ئەو ھێزانە سەر بە حکوومەتی عیراقن، بۆیە ئێستا سەرکردایەتی سیاسیی کوردستان لەگەڵ وڵاتان لەسەر خەتن بۆ چارەکردنی ئەو رەوشە کاولکارییەی کە ئەو ھێزانە بەسەر دووزخورماتویان ھێناوە".

لەبارەی جووڵەی ھێزەکانی حەشدەوە دەڵێت: "حەشد زیاتر لە ٦٠ گرووپن، ھیچ تەرتیبێکی سەربازییان نییە و سەرەڕای ئەوەی بە یاسا وا دەردەکەوێت سەر بە حکومەتی عیراقن، بەڵام ھەرگرووپە و سەر بە کەسایەتێکی عیراقە،‌ بۆیە بێسەروبەرن و کەس خەتی کەس ناخوێنێتەوە".



2021بینین‌‌‌
5 ڕۆژ پێشتر - Dec 6 2017 7:45PM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ